A Garda Civil interceptou na peaxe do Porriño un transporte de preto de 400 quilos de pescada que circulaba ilegalmente pola autoestrada AP-9. No transcurso do mesmo operativo incautáronse tamén algo máis de 300 cigarros puros de contrabando.
Os feitos sucederon onte, martes, na peaxe do Porriño, no transcurso dun control selectivo dos vehículos que circulaban pola AP- 9, no que participaron efectivos da Patrulla de Fiscal e Fronteiras e a de Seguridade Cidadá da Compañía de Vigo.
Nun dos vehículos inspeccionados, un camión conducido por un veciño de Ribeira (A Coruña), de 33 anos, a Garda Civil puido comprobar que transportaba produtos da pesca e entre eles un lote de 40 caixas de plástico que contiñan 384 quilos de pescada. As caixas carecían da etiquetaxe propia destes casos e a pescada non ía amparada polo preceptivo documento de acompañamento.
Os feitos puxéronse en coñecemento da Delegación Territorial da Consellería de Sanidade de Pontevedra e procedeuse ao precinto da mercadoría que continuou o roteiro que tiña previsto ata o seu destino no peirao no peirao de Ribeira (A Coruña), onde pasaría ao dispor das autoridades sanitarias competentes na materia.
No marco do mesmo dispositivo interceptouse un turismo, conducido por un veciño de Barcelona, que transportaba 386 cigarros-puros de importación no maleteiro, sen a documentación que debería amparar a súa circulación e tenda. A Patrulla Fiscal procedeu á aprehensión e depósito dos puros nos almacéns de Loxística de Pontevedra e levantou a correspondente acta por unha infracción de contrabando, que se remitiu á Administración de Aduanas e Impostos Especiais desta cidade.
